Saga

Þekkingarnet Þingeyinga er símenntunar-, háskólanáms- og rannsóknasetur sem starfar á grunni tveggja stofnana er sameinaðar voru árið 2006. Um er að ræða símenntunarmiðstöðina Fræðslumiðstöð Þingeyinga annars vegar og háskólanáms- og rannsóknasetur sem starfaði einnig undir nafni Þekkingarseturs Þingeyinga fram að sameiningunni. Fræðslumiðstöðin hóf starfsemi árið 1999 með aðsetur á Kópaskeri og sinnti fullorðinsfræðslu og símenntunarstarfi í héraðinu. Þekkingarsetrið var hins vegar stofnað árið 2003 samhliða Náttúrustofu Norðausturlands, sem starfar innan setursins. Þekkingarsetur Þingeyinga var stofnað í júlí 2003 og hóf starfsemi 1. nóvember sama ár. 
Sameinuð stofnun undir nafninu Þekkingarnet Þingeyinga byggir á starfi og markmiðum beggja þessara stofnana. Hún tekur því við hlutverki Fræðslumiðstöðvarinnar sem fullgild símenntunarmiðstöð samhliða öðrum slíkum á landinu en að auki hefur stofnunin þær skyldur að reka fullbúið háskólanámssetur og sinna þjónustu við háskólastigið ásamt því að vera miðstöð rannsóknastarfs í Þingeyjarsýslum. 

---