Eitt af markmiðunum með stofnun Þekkingarnets Þingeyinga er að skapa miðstöð rannsókna fyrir Þingeyjarsýslur. Í Þingeyjarsýslum er mikill efniviður til rannsókna á hinum ýmsu sviðum, sem skýrist af miklum fjölbreytileik í náttúrufari og menningu.  Enda hafa í gegnum tíðina allmiklar rannsóknir verið stundaðar á svæðinu af einstaklingum, fyrirtækjum, rannsóknastofnunum og háskólum. Þessi starfsemi hefur fram til þessa tiltölulega lítið tengst samfélaginu sjálfu þar sem ekki hefur verið mikil aðstaða fyrir hendi til rannsóknastarfa í héraðinu. Þekkingarneti Þingeyinga er ætlað að bæta úr þessu og skapa vettvang og aðstöðu til rannsóknastarfa og úrvinnslu gagna.